منتــدى القريـــن الاول

اخبار القرين و صور و برامج و رياضة واحاديث اهل البيت عليهم الصلاة والسلام و اشعر وقصص و ......
 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 قصة كومديه

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
موج القوافي



عدد المساهمات : 16
نقاط : 48
تاريخ التسجيل : 10/12/2009

مُساهمةموضوع: قصة كومديه   الجمعة ديسمبر 11, 2009 1:08 pm

مره من المراريت قمت من النوم مفزوع كن احد راش علي مويه ( والله وتطورت وبديت اقول مويه ) قمت وكل شي بي يقطر عرق وسعابيل
قمت مفزوع قرير العين منكمش على ذاتي فيني حكه بنت كلب بثلاث مناطق بوقت واحد الخشم والاذن والحنجره مدري وش ابدي ووش اخلي <<<< قرير العين مالها دخل بس بالنفس ودها تلعب معهم
عقب ما بوبزت وركدت وصحيت شوي جلست افكر وش انا مسوي بالحلم لا يكون الثور حقنا مغتصبني !!!
لانه غاثني من يشوفني عند البقره يتركها ويجي لمي يشمشم وسعابيله تبدا تقطر كنها حنفيه مشقوقه (:
جلست ارجع شريط حياتي لمدة خمس ساعات لورا وبديت اقلد ذيك اللي تقول ( ياويلي من التلاتين ) ام لسان كنه عسكريم بالفراوله <<<< قطرت السعبوله قسم بالله ..على العسكريم موب على شي ثاني .
تذكرت اني حالم اني داخل غابه كبيره بالحيل وفيها حيوانات ونهر كبير مره تسنه الساقي اللي بمزرعه ابوعلي جارنا اللي لو احط نصف ساقي عليه صار كنه الجسر المعلق للنمل
تذكرت اني وانا اتمشى لقيت اسد لايذ له تحت شجره ومعلق السروال ومبوبز مدري وش يسوي هو يسولف مع نفسه هو يبربس مدري المهم اني وبدون ما اقصد طبيت بالعفش وحسيت اني كسرت عينه وابن الكلب اقصد ابن الاسد وهو اللي يقوم ونص ذبابين العالم جايه وراه كنهم بزران ورا سيارة فليت وخذ ياركض بالغابه تقول ذابح امه , انا اركض وهو وراي والحيوانات يضحكون علينا لاني كنت اركض وسروالي كل شوي ينسلح وانا ارفعه واركض والاسد بدون سروال مدرعم وراي وانا اقول له تكفى يالاسد فكني .. تكفى فكني .. وهو يقول من عمك ياكلب !!
وكل من شاف المشهد حسبه كاسر عيني لدرجة ان كل شوي يركض وراي حيوان مره فهد مره نمر حتى الغزال تجرأ وبدا يرقم ولد اللذين صار الحيوان يركض لين يوقف حدي ويذب الرقم ويقول لي اموت على الطخمان انا ياشيخ دق الساعه 7 الصبح والوعد ورا شجره الصنوبر !! <<<<<< عليهم مواعيد ذا الحيوانات مدري وش تبي .. المهم شكلي بدخل برنامج SWAN اغير ملامح خشتي السمعه شكلها راحت .

بس اشوي اني قمت من النوم قبل لا تروح السمعه صدز عاد وين اودي وجهي من بقرتنا اللي ماسك عليها فلم وثائقي وذالها فيه كل يوم تبقي لي نصف سطل من حليبها ولا افضحها قدام بقر الحارة عشانها مصادقه تيس .
بلشت بعمري ودي اعرف وش يبي ذا الحلم المؤلم مع اني مانيب احب اسأل عن الحلوم بس انشطب رأسي انا وش جابني للأسد ووش دخل الغابه وليش سروالي ينسلح مع اني من تالي سامن والسراول ما ينفصخ الا بالمقص !! <<< حلم حير العلماء صدز
جلست افكر بيني وبين نفسي ..
تحري يابرطوم يصلح تقول الحلم للناس او تفسره ؟؟
اخاف اقوله لواحد من اخوياي يذلني فيه يقول انك ورور تالي عمرك ولا مع مين مع اسد !! <<< احس كبيره بحقي لو انه مع فيل كان عادي الفيل يعطي حنان موب مثل الاسد نذل يأكلك
صرت انسان حزين منكب على نفسي <<<< بياله انت تنكب !!
صرت ما ارفع عيني للناس احس ان قلبي راح ينفطر من الألم صرت اخاف اطلع للشارع لاني كنت احس ان فيه لوحه فوق راسي تأشر علي تقول كاسر عينه اسد ..
مع انه كان حلم بس مدري ليش كنت خايف انه يكون صدز <<<<< خايف ان الثور سواها وانا نايم ولد اللي مانيب قايل
جلست عند التلفزيون فاق كشرتي طبعاً مالي وجه اساطع فيه الناس يلعن ام المذله وكسرة العين .
اسد مره وحده !!
بديت اجلس عند التلفزيون مانيب يم احد بس اغير بذا القنوات وما ادري عن شي بالحياة عيوني تتقلب مع الشاشه صار تفكيري يصب في حوض البحر من كثر ما افكر بذا الاسد الداشر المارج اللي شوه سمعتي ودي اعرف وش تفسير ها الحلم المؤلم .
المهم كنت اغير بها القنوات وكان اصبعي معلق بالريموت والقنوات تروح وتجي كنها ريش كنديشن زايد عليها الكهرب وفيما انا اغير واغير عيوني بالشاشه والفكر بعيد مادريت الا واصبعي يرتفع عن الريموت ويوقف التغير عند قناة كان فيها واحد يفسر احلام وشلون وقفت مدري بس الظاهر من كثرهم ها الايام لو تغمض وتختار أي رقم يطلع لك واحد .
بديت اتابع البرنامج وانتظر الرقم يطلع على الشاشه بدق عليه اسأله يمكن ارتاح يمكن يطلع شي حلو معي اني مانيب احب افسر شي لاني خابر ان اللي وراي كله أضغاث أحلام ( احسبه اذان نوال الكويتيه )
طلع الرقم اخيراً على الشاشة والمذيع يتميلح قدامي لين حوم تسبدي لدرجة اني طرشت عشر مرات وبديت احس اني احمل طفل الخطيئه من ها الاسد <<< طفل من اسد ولا اقابل واحد يبي يصير حلو بالغصب شماغه صاير كنه مثعب من كثر الكوي .
من كثر ما يتميلح شكله حاط نشى بساعته بعد من كثر ما يرززها قدامي بس الشكوى لله محدود حد على ها المملوح هو ووجهه اللي كنه طباقة كلبليتر طايحه بكيس طحين
طلع الرقم ومسكت التلفون وبديت ادق عليهم ... وغريبه ولأول مره بالشرق الاوسط مسك معي الخط !!! يا للهول !! مش مصدق عنوني ؟!؟!
اكيد مااات ديناصور اليوم .!! وش السالفه <<<<<<< امنيتي ادق على شي مباشر ويمسك الخط لو بعد البرنامج
المهم طول يرن التلفون وماحد يرد وانا اللي انشب لهم بس ادق لين تعبت يديني وبديت ادق بخشمي من الحماس ... لين ارتفع ضغطي من ردات الحظ حتى ذولا مطنشين
واخرتها وبعد ما مليت من الاتصال عرفت ان البرنامج تسجيل ومعاد لحلقه لها يومين وانا اللي يطيح وجهي عند صديقتي الذبانه اللي مسكنها بالدولاب حقي من يوم هي صغيره ..
واااافشيلتاه واخزياه بس
تكفي فضيحتي عند الحيونات عشان سالفه الاسد وش عاد افشل بعد عند الذبابين من يعبرني غيرهم !!
مسكت الذباب اللي عندي عقب ماشفت اني طحت من عينه وربطته وكتفته وقلت انا مفسر حلمي يعني مفسر وانت اللي بتوصلني وتخلي صوتي مسموع قدام الناس ..
وانا اللي امسك سكين خضره ... اقصد ( ريد ) واجيب كاميرا واثبتها قدام الجدار واجلس انا والذباب تحت رجولي واكتب على الجدار من وراي
ياتلحقشي ياماتلحقشي ياكوفي عنان
واشغل الكاميرا واخلي الذباب يتكلم : فزززززززز فز فزززفزفزفزفز برررررر فزززززززز ززززززززززز ×6
بعد الترجمه تطلع
انا هذا الشخص الماثل خلفي سوف يكتلني ( معليش لكنة ذباب بريطاني )6 مرات
اناشدكم بأن تلبوا مطلبه وترسلون له جوال الثريا وتخلون احد برامج تفسير الاحلام يردون عليه ولا سوف يذبحني بعد يوم ونص ......
بعد ثلاث ساعات بس لقيت معي خمس جوالات ثريا وخمس بياجر وكنود <<< لو ان الذباب آدمي كان قالو بقريح يروح مثل ما يروح غيره
المهم وش علي اهم شي تلبى مطلبي
حددو لي برنامج يجي بقناة عربية لواحد يقول انه يفسر احلام وبعد الغداء يشتغل منجم والعصر قارئ فنجان يعني بتاع كله
جلست قدام التلفزيون والذباب قدامي والريد بيدي والسماعه باليد الثانيه عشان أي حركه ها اضرب بالمليان وعلي وعلى اعدائي ..
بدا البرنامج وجاء المفسر هو وكرشته اللي كنها مطاره
جلست ابرق بخشته قلت وش ذا الآدمي احس انه يسلك مواصير المصلحه باثمه من سواد سنوانه تقول شكمان ددسن حول تجيم مكينتها قلت ما عليه خل اخلص شغلي واثمه بقريح بس يفسر لي الحلم
بعد ما طلع الاخ دق جوال من الجوالات اللي معي ترددت ارد ولا ما ارد خفت تحسب على مكالمه دوليه وانا مدري
بس بالاخير قلت ارد وش وراي كل شي بظهر ذا الذباب
رديت
الوووو مين ؟؟
المتصل : معك قناة الهلس الفضائية عشان تفسير الحلم بتاعك يابيه
انا : طيب خل اتلطم ياخوك اخاف ان الجوال فيه كاميره وتطلع خشتي قدام العالم !!
المتصل : يا بيه تكفى اويلاوه الفقه مش فاضين لك انت وصوتك ده اللي زي صوت الموتسكل .
انا : طيب انت انا جاهز انت وخياسك يالمخيس لعنبو بليسك ريحتك واصلتني انت تتروش بفسيخ وبعدين تشربه يالمروح مدري هذا اثم ولا كوع ريحة!! من ورا الاسلاك واصله ريحتك .

صرت على الهواء اخيراً :
المذيع : الو معانا اتصال من الاخ المتلطم من السعودية عاوز يسألك يادكتور .
انا : الو مساء الخير يادكتور معليش بسأل وبطس لو سمحت لاني لو اطول دقيقه بعد احس اني بحط الفليت بأثمي واشب فيه واموت من شين ريحتكم وزين اشكالكم .
الدكتور : ايوه اتفضل يابيه تحت امرك.
انا : يادكتور انا حلمت اني دخلت غابه ....... الخ
الدكتور : اها بس بسطيه يابيه ما تاخذش ببالك يابني .
بعدها حط راسه تحت الطاوله وكنه يفتح كتاب او شي شكله توهق متعود على حلوم اهل ديرته ماتعود علينا يالشهبان .
رفع راسه الدكتور وناظرني نظره تذكرني بالاسد اول ما شافني اناظره وهو مبوبز وبعدين ضحك .
قال : انت متقوز يابيه . قلت : ايه وش دراك يالذكي .
قال وجفونه واصله طباقة راسه من الوناسه عقب كلمة ذكي : اجل راح تطلق مراتك !!
قلت اصلاً مانيب متزوج قل غيرها بس بغيت اللعب عليك يالمخفه ..
ناظرني نظره ثانيه تذكرني بالاسد يوم يقول لي .... من عمك وانا اصيح قدامه ...
قال انت تشتغل .. قلت لا .. قال اجل راح تنفصل من شغلك !!!
قلت خير على كيفك هي اقول لك اني مانيب اشتغل تقول راح تنفصل ... قال انا عارف انك تضحك علي فبى قلت اهجم انا بالمردات !!
قلت اقول يادكتور ورا ماتروح تشفط لك ماصورة وتسلكها اصرف لك منتب وجه تفسير جاي تلعب على الخلق انت وراسك اللي كنه بوري سيكل .
قطعت الاتصال وقمت وفكيت الذباب وقلت له طس .

جلست فتره حالتي حاله بس بالبيت ما اطلع لاني كل ما طلعت اشوف نظرات الاستحقار حتى بالبقره اللي عندنا صارت تستحقرني وتكتم الضحكه <<< تضحك اذا عطيتها ظهري بنت الكلب
صار بيتي منتجع للحيونات الأليفه كل من طلع خويته يعزمها على شوفتي يجيبها ويقول شوفي هذا البيت ترا فيه واحد كاسر عينه الاسد

بعد مرور الايام بديت اطلع من البيت صرت اروح لكل مكان وما اشوف احد يقول شي استغربت بس ارتحت .. هو انا افتك من ها السالفه بس
بديت اعوض ذيك الايام الأليمة واروح اتمشى بأي مكان اهم شي انسى وبس ومره من المرات جيت من عند حديقه الحيوانات قلت خل ادخل اشوف الطيور والعصافير <<< يقالي رومنسي والله ان الضب يخب علي
دخلت الحديقه وبديت اتمشى بين الاقفاص واتمتع لين وصلت لقفص كبير بالحيل كنت احسبه للفيل وانا لاني مسوي برطوم صديق الحيوان احب اسوي فيها كريم واوكل الحيوانات بيدي
جلست عند القفص انتظر الفيل يجي وكان السور شوي عالي وانا واقف وراه وما اشوف الا البعيد بالقفص بديت اصوت قلت يمكن يجي ذا الفيل مشتري له فيشار منتهي تاريخه بريال وحسافه اكبه او اكله <<<<<< موب موفر شي ها الجراده
وانا اصوت واصوت مادريت الا وش يتحرك عند السور اللي قدامي ويضرب الجدار بيده قلت وش ذا الفيل الصغير !!
بديت اويق خشتي من ورا السور والشبك بشوف وش ها اللي هنا .... وانا اتشوف شفت شي وبدا قلبي ينكمش وبديت ارتاع .. شفت شي ذهبي على اسود خفيف <<<< كنه شعر الاسد
قلت خل اتأكد وانا اللي اتكلم واصوت عشان اشوف وشو واتاكد قلت يمكن نمر لابس باروكه يستهبل
مادريت الا وهو قايم قبالي ويوم شافني طلعت سنونه يضحك
قال : هلا والله بالحلو وينك ياااخي تبي افتح لك الشبك يالاطخم !! ( طلع الاسد )
وبدا يغني
جيتني مرحبا بك بعد طولت غيابك
وانا اللي اطيح على راسي بقوه بالارض !!!
ويوم بديت اصحصح شوي شوي الا وانا اشوف نعال بيد تبي تلزخني مع الوجه !!
بديت اسمع صراخ بقوه كل ماله يقوى شوي
أمي فوق راسي وبيدها النعله :
قم صل صل الله وريدك قم جعلك المهيد اللي يهديك
وانا اللي افق كشتري من الوناسه وانط لراسها وابوسه من الفرحه لانها طلع حلم بوسط حلم موب صدز.
طارت عيون اميمتي من ها الادب الجم اللي طب علي فجأة وأنا اللي مكسفن بها كل فجر مانيب اقوم الا اذا سكروا باب المسجد الصبح ..

ما يستفاد:
1- مو كل حلم يتفسر وموب كل مفسر يعرف لها الشغله
2- لاعمرك تفكر تصير اطخم .
3-آسف على الاطاله وعلى المصاله


تحياتي للجميع وكل عام وانتم بخير ....




http://www.m3rof.com/vb/index.php

منتديات المعروف - عالم من المعرفه ..
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قصة كومديه
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتــدى القريـــن الاول :: سفينة الشعر و القصص :: قسم القصص-
انتقل الى: